ايجيبتن أجمل بلد في الدنيا

وقت كاس العالم الأخير اللي كان في البرازيل
طبعا الجزيرة الرياضية كانت مشفرة الرسيفر
والعروض بقى كانت غالية
وكنا على حواف رمضان
قلت اروح لولادي لينا وهادي في المانيا
اتفرج معاهم بدون تشفير ولا اعلانات
وسافرت وكانت أيام فوللي

كانت كالطبيعة التقليدية لأغلب المصريين بشجع البرازيل
والاختيار التاني كان المانيا عشان الولاد
المهم يا محتلام كان فيه مباراة في البدايات بين المانيا وفريق من ذوي البشرة السوداء
وكان يوم اجازة
اتفقت انا والولاد نتغدى على نهر الرور ونستمتع بالشمس
ونتفرج على الشاشات العملاقة
واحنا قاعدين في امان الله
بصينا اللهم صلِّ ع النبي
طابور من المشجعين السكارى والمراهقين ماشيين مشية عسكرية
وطبعا لمحونا فوقفوا قدام طرابيزتنا وبلغة حادة
صرخ القائد فينا
هاانتم منين انتوا
بالالماني طبعا
وتوقعت العيال ولادي يطلعوا الباسبور الالماني ونخلص
أو هيبلعونا الاكل ويرمونا في النيل بتاعهم
دايما واحنا هناك بنقول تعالوا نتمشى على النيل ونبص لبعض ونضحك
المهم لينا بنتي عملت حركة بنت جنية ماتعملهاش غير واحدة من عيلة عاشور في أسيوط مولودة في المعادي  ومتربية مابين ميت عقبة وألمانيا
وقفت وردت بهدوء شديد
انا من أجمل بلد في الدنيا
العيال اتلخبطوا ةهاجةا
الزعيم سكتهم
وبص لنا بجدة : يعني منين يعني؟
قالت بثقة : من مصر.
فجأة الواد الزعيم هتف بالالماني: ايجيبتن ايجيبتن
وقام مدينا التحية العسكرية
ومش الطابور بخطوة عسكرية وهما بيهتفوا ايجيبتن ايجيبتن
وطلبتلنا آيس كريم
تحية لبنت ايجيبتن السمرة

Source