بواب

وبصدقة لن تتكرر كنت طالب متفوق في ابتدائي

فواحد قريبي بيشتغل بواب لعمارة فخمة في الزمالك اقترح علي اني بعد المدرسة أروحله الزمالك وهو عنده فرصة شغل مناسبة

تاني يوم بعد المدرسة عديت الكوبري من ميت عقبة للزمالك في ربع ساعة

كانت عمارته في الشارع اللي على ناصيته فيللا أم كلثوم رحت مالقتوش قعدت مكانه ع الدكة واتعاملت كبواب

واتحركت الخيالات في دماغي يكونش بيرشحني اشتغل بواب؟

وهو مستخبي في مكان بيراقبني بساعد الناس ازاي وباشيل عنهم الشنط

وباخد بقشيش

وأكيد هيقسم معايا

للحظة فكرت ان ده لا يلق بطالب متفوق حاصل على 99.5%

في الشهادة الابتدائية وطلع أولى اعدادي في مدرسة السادات الاعدادية بنين

فكرت مع نفسي لقيت الانتماء للزمالك حتى كصفة مساعد بواب فيه الكتير من الخير

وخصوصا اني من النوع اللي عمري ما اتعاملت مع الكتب والمذاكرة على انها تكدير

في اجازة الصيف باتصرف واجيب كتب السنة الجاية الحكومي والخارجي

واقرا كل كتاب في ليلة والخصه في ليلة تانية خلال شهر انجز كل حاجة وباقي السنة اقعد اناكف الاساتذة وأسالهم

نهايته اقتنعت بان افضل ما يناسبني هي وظيفة مساعد بواب

وقررت أسأله اني أحول مدرستي لمدرسة في الزمالك

المهم عم أبو السعود ظهر مبتسما وقال حقك عليا كنت باصلي بس كويس انك استنتي

كبشت الفلوس الممنوحة لي كمكافأة في الساعة اللي فاتت لقيته بيزق ايدي الخير كتير ده رزقك

تعال معايا مشينا خطوتين ووقفنا قدام مطعم كنتاكي وشاور من ورا القزاز لراجل لابس قميص وبنطلون طلع وسلم علينا

قال له ده الولد اللي كلمتك عنه قالي بنظرة متفحصة :

اشتغلت قبل كده؟

قلت له ايوه في فرن جنبنا سحلجي

اتلفت حواليه يعني ماسبقلكش الشغل في محلات

أكل قلت له علمني وجربني

وهيعجبك شغلي قالي طيب روح دلوقتي

وهنكلم عم ابو السعود سلمنا ومشينا

سألت عمي : هي الشغلانة ايه قال : عامل نظافة قلت له كنت فاكر بواب ضحك أبو السعود كثيرا: وقال لي ياكش انت فاهم شغلانة البواب انك تقعد على الدكة؟

دي شغلانة بنت ديك كلب مبتنامش متهني

مطلوب على حساب السكان 24 ساعة ربنا بعدك عن الشغلانة المقرفة دي قلت له آمين يارب

وعلى مطلع الكوبري سلمت عليه ورجعت تاني ميت عقبة

الرابط