زي كل يوم الصبح بييجوا
عادي
زي كل يوم الصبح
بييجوا
يزقزقوا ع الشباك اللي تحتيه الياسمينة
وبحركة بريئة
يرشوا الفل والياسمين وحبة قرنفل بلدي
في الصالة
وبحركة أشد براءة
وتواطؤ
بتيجي أمي
شعرها مبلول وقصير
آ لا جرسون
ووش منحوت
نفرتيتي
تجيب الصينية الالومونيوم
تقعد تحت الياسمينة
وتنقي الدنيبة من الرز
لحد العصر ما يدن
أو جرس الكنسة يدق
تلاقيها
في حالة مزج ناعم
بقت برة الشباك
روح ناعمة
زي اصحابها بيطيروا ينقروا على شبابيك حبابيهم
طالعين بمنظر واحد
آخر لقطة سابوها ورحلوا ورا الشبابيك
وهم بيقولوا وهي معاهم
ماتنساش تسقي الفلة والياسمينة اللي جوا روحك
Previous Post
Next Post