هادي ابني وانا وأكيرا كيروساوا وظابط المباحث
ولا كان هاممني العنين القزاز اللي كان مستخبي وراهم
كبير رجال المباحث
ولا الاسئلة الاحصائية الكتير
ولا حتى اني اثبت له أي حاجة
اللي كان بيلمع في دماغي
ازاي الواد هادي ابني اختصر 27 سنة بيننا وفاجئني انه بيحوش فلوس عشان يحضر مؤتمر ومهرجان عن المخرج الياباني اكرا كيروساوا
وانا اللي اتعرفت عليه بعد سنتين دراسة في معهد السنيما
ازاي 30 سنة يمروا ابستمولوجيا ومعرفيا
وازاي اقول للواد هادي خد اشتريلنا تذكرتين عايز احضر معاك
يقوللي هادي لأ خلليني أشوف الاول وأسأل اليابانيين بنفسي
ومش لازم كل حاجة في السنيما اشوفها من عنين ودماغ أبويا عشان ليه علاقة بالسنيما
ولما سألني الظابط بتعمل ايه في الواحات
ماكنتش بافكر غير اني أزور قبر يوسف ادريس استاذ القص
واكلم هادي واتفرج على فيلم الاحلام بتاع كيروسوا
وفكرت اقول للظابط هاتلي قزازة بيرة ساقعة
وحبايتين ترمادول وسيجارة حشيش
وفكك م الاسئلة دي
وتعال نطلع فوق سطح مبنى المباحث
وانا افرجك على أجمل مناظر في الواحات
اللي عمرك ماهتشوفها
وبلاش الاستعداء المجاني يا كابتن
Previous Post
Next Post