ايه اللي صحاك بدري؟
ايه اللي صحاك بدري؟
والا انت نايم وخري؟
ولا مانمتش خالص؟
لساك بتحلم بكوبري العورية
وشارع الازهر؟
ونفق الحسين
وبياعة الزيتون في سوق الليمون
في شارع المعز؟
لساك معين نفسك نباتشية وحراسة
على بوابات القاهرة؟
وحافظ كل طوبة بتقول ايه؟
لساك لما ضاقت
بتقول بكرة تفرج؟
لساك بتمشيها
م السكة البضا لسوق السلاح
لسيدي محمد الذوق اللي ماسابش مصر؟
لساك بتسرق م الزمن
ربع سمين
وتاكله في الخباثة ويا القطط
وكلاب الشوارع؟
لساك بيسرقك الحنين
انك تقلع ملط وتنام على أقرب باب
كان كنيسة ولا جامع؟
لساك نفسك تصيد فرد سمك كبيز
وتنادي كل الناس
آدي دمي
اشربوه
آدي قلبي
كلوه
على الله تعرفوا معنى المحبة
يا بشر
Previous Post
Next Post