ستة أكتوبر

أهم اتنين ستة أكتوبر في حياتي

والاتنين الساعة اتنين الضهر

لما سمعت أمي واخواتي بيزغرطوا

وبيقولوا عبرنا القناة

ده كان سنة تلاتة وسبعين

بعدها بكذا وعشرين سنة

١٩٨٦

كنت في مزرعة طرة بتهمة تكوين تنظيم لقلب نظام حكم مبارك بالعنف والارهاب

والمحامي بتاعي عن النبيل نبيل الهلالي

ولما سألنا النيابة التنظيم ده مكون من مين؟

قال هو لو حده

يعني مبارك بحاشيته بحرسه بالاسرائليين بالامريكان بسلطاته بباغنوجه

كان خايف مني انا لوحدي أقلبه

وكان يوم ستة اكتوبر يوم جمعةوالساعة اتنين

لقيت الظابط بيناديني من العنبر وبيحط ايده على كتفي وبنتمشى في المزرعة وفجأة لقيت نفسي برة باب السجن

والظابط اختفى

كان بيسربني ابن العبيطة زي لو بيسرب قطة ضالة

وقفت ييجي نص ساعة محتار اعمل ايه

ارجع لباب السجن واخبط اقول لهم عايز ادخل

ولا استنى عسكري معدي أسأله

ولا اعمل ايه وانا ببنطلون تريينج وشبشب وفانلة چيل زرقا

لحد ما لاقيت راجل بحمار بعربية كارو

قولت له تاخدني معاك لاول الطريق هز راسه وقال لي نط

قولت له بس ما معاييش فلوس بص لي بطرف عينه

وقال لي: والدخان علينا

وقام نطلع علبة كليوباترا

مطبقة اداني منها سيجارة مكرمشة

وماستريحتش

وهديت الا اول ما لقيت بيطلع الشطاطة

وبيضمم ايديه على العود المولع

وبيقولي اتفضل ولع يا استاذ

الرابط